CEBU, Philippines - Duna nay solusyon nga ipresentar ang Metropolitan Cebu Water District (MCWD) labot sa ilang pipeline nga nahimutang sa Mandaue-Mactan Bridge nga maapektuhan subay na unya pag-ayo niini.
Karong adlawa usa ka meeting ang himuon diha sa Department of Public Works and Highways (DPWH)-7 nga tambongan sa kadagkuan sa MCWD ug sa Jegma Construction diin mahibaw-an dawaton ba ang proposal sa MCWD.
Gibutyag ni Atty. Jorge Gabriente, Assistant General Manager sa Technical Services Department sa MCWD maayo gyud unta nga unahon og trabaho ang pipe support aron mawagtang ang kabalaka nga mauyog kini kun sugdan na ang pag-ayo.
Ang MCWD unang misugyot niadtong miaging tuig nga ilang butangan og stainless steel rods ang ilang mga tubo nga gihulagway nilang pang-long term solusyon kay dugay kining tayaon.
Ang maong proposal gihatag ngadto sa Jegma Construction apan niadtong Pebrero 9 ning tuiga lang sila gipahibawo sa dili makaya sa kontraktor ang maong proyekto hinungdan nga niadtong Sabado Pebrero 13 dali silang mihatag sa ilang ikaduhang proposal. Ang ikaduhang proposal dili na stainless steel ang ilang ibutang kondili hot deep Galvanized Iron coated steel rods.
Hinuon sa pagtan-aw sa MCWD sa ilang mga tubo diha sa taytayan lig-on pa kini apan kinahanglan gyud butangan og pipe support kay ang uban nagsugod na sa pagkataya.
Si Gabriente mipasalig nga ang MCWD makig-alayon gyud sa DPWH ug sa kontraktor aron mahatagan og solusyon ang nalangan na kaayong pag-repair sa maong taytayan.
Nasayran nga ang maong pipeline sa MCWD nagsuplay og 12 mil kubiko metros nga tubig kada adlaw nga maoy gigamit sa 60 porsiyento sa mga molupyo sa Mactan Island. (BANAT NEWS)