CEBU, Philippines - Maayong pagkapaig sa usa ka 57-anyos nga lalaki human kini naapil og kasunog sa iyang gipuy-an nga balay diha sa Sitio Bumbil, Brgy. Lusaran ning Dakbayan sa Sugbo sa nakalabay nga gabii.
Ang biktima naila nga si Elpidio Lauria, nagpuyo sa maong dapit kinsa gidudahang nakainom niadtong tungora ug wala makamatikod sa pag-ulbo sa sunog sa iyang panimalay.
Matud pa ni Police Officer 3 Winston Ybañez, imbestigador sa Homicide Section sa Cebu City Police Office nga nahinabi sa Banat News nga walay kauban sa ilang balay si Lauria kay anaa na sa Talamban nagpuyo ang iyang asawa ug anak.
Sa inisyal nga imbestigasyon, gikatahong hubog nga nauli sa iyang gipuy-an si Lauria human kini nakig-inom sa iyang mga paryente kay bag-ong gikasal ang iyang pag-umangkon.
Matud pa nga nakita nga nagdagkot kini og kandila kay wala man kini linya sa kuryente apan pagkaalas 11:30 sa gabii nasunog na ang balay. Kandila nga nasaghiran maoy gidudahang hinungdan sa sunog.
Hinoon gipasabot ni Ybañez nga aron pagwagtang sa mga pagduda, ilang gisugyot nga ipa-autopsy ang lawas ni Lauria aron tan-awon kun adunay foul play sa maong hitabo. (BANAT NEWS)