Gibuhian bugti sa bayad

CEBU, Philippines - Usa ka polis nga sakop sa City Intelligence sa Cebu City Police Office ang gipasanginlang mipagawas sa duha ka dinakpan sa ilang operasyon batok illegal nga drugas diha sa Brgy. Duljo-Fatima bugti sa kwarta.

Si Superindentent Aileen Recla hepe sa Investigation and Detective Management Branch (IDMB) nga nahinabi sa Banat News miingon nga bisan og wala’y mobarog nga reklamante sa maong pasangil ang ilang buhatan mohimo gihapon og imbestigasyon.

Base sa text message nga gipadala gikan sa usa ka concerned citizen usa ka sakop sa CIB ang midawat og P75 mil bugti sa pagpagawas sa duha ka lalaking nadakpan sa maong operasyon.

Ang polis nga gisumbong ang gitago lang una sa Banat News ang pangalan.Ang operasyon sa CIB nahitabo pasado alas 5 sa hapon niadtong petsa 14 diha sa C. Padilla Street, Duljo Fatima.

Unod sa text message nga wala gi-blotter ang pagkasikop sa duha nga nibayad og P75 mil kay giareglo lang, apan kadtong usa nga way ikahatag mao lang ang‘gituloyan (gipriso).’

Sumala pa ni Recla nga sa dagan sa hitabo daw buot nga ipagawas nga tulo gyud ang nadakpan sa CIB sa maong operasyon apan human nadala sa buhatan sa CIB napamatud-an sa interogasyon nga usa lang ang nalambigit sa illegal nga drugas maong gibuhian ang duha.

Apan tungod kay naghisgot na man og salapi ang nagpadala sa text, si Recla miingon nga angayan nga kini nga imbestigaron.

“Pwede ma-justify nga wala to’y labot ang duha after sa interrogation kay sa operation sa polis, dili tanan nga madala or ma-invite sa office suspect na, pero naghisgot na man na og kuwarta, that’s another story,” matud pa ni Recla.

Gipanawagan usab ni Recla ang nagpadala sa text nga makig-alayon sa ilang buhatan bahala na og dili na magpaila kung nahadlok kini sa iyang seguridad.

Kinahanglan pa nila og dugang impormasyon nga makatabang sa ilang imbestigasyon.

Kung mapamatud-an nga tinuod ang maong reklamo mapasakaan og kasong “grave misconduct” ug hayan matangtang sa serbisyo ang polis nga gireklamo.

“Seryoso kaayo ni nga alegasyon angayan lang ni nga tan-awon nato og maayo,” saysay pa ni Recla. Ang usa sa tulo nga nadakpan nga natanggong karon sa kapulisan nga nahinabi sa mga tigbalita miingon nga siya lang ang nabilin ug napriso human siya lang ang gipaangkon sa krimen.

Si Lito Paculanang, 18, miingon nga wala gayod kini dala nga drugas atol sa hitabo ug ang iyang kauban lang ang duna’y dala.

Apan nagsabot-sabot daw silang tulo ug gipaangkon sa iyaha ang pasangil kay aron makagawas ang duha nila ka kauban.

Si Paculanang wala na lang mireklamo human siya gipasaligan sa agalon sa duha niya ka kauban nga piyansahan lang aron makagawas.

“Gibalhin diri nako akoy gipapriso…. Di gani unta okey, unya gaingon man siya nga piyansahan ra niya,” sumala pa ni Paculanang.

Si Paculanang midugang nga igo lang kini nagpuyo sa iyang mga barkada sa maong dapit kay wala kini pamilya diri sa Sugbo kay siya lumad nga taga probinsya sa Negros.

Base sa spot report nga gipagawas sa CIB, pito ka mga gagmay nga paketeng gituohang shabu ang nasakmit sa kapulisan gikan ni Paculanang.

Ang deputy chief sa buhatan sa CIB, Insp. Gomersendo Mandawe nga nahinabi sa Banat News nakurat sa maong impormasyon.

Si Mandawe mitug-an nga gusto niyang masilotan ang maong polis kung tinuod kini tungod kay dili lang ang ilang buhatan ang nauwawan kondili lakip na ang han-ay sa kapulisan dinhi sa siyudad.

“Di nato na i-tolerate kung tinuod na, kay maapil sa kaulaw ang tanan nga polis ana, kung unsa man ang mahatag namo nga tabang sa imbestigasyon sa IDMB, kung unsay ilang kinahanglan andam kaayo mi motabang,” sigun pa ni Mandawe.

Ang CIB nakontrobersiya usab niadtong nakalabay nga tuig human gidudahang anaa’y ‘hudas’ sa ilang han-ay nga maoy tigpahibalo sa mga drug personalities sa himuong mga police operations aron sila makasibat. (BANAT NEWS)