CEBU, Philippines - Dili lang usa kun dili tulo ka hepe sa kapolisan sa Probinsya sa Sugbo ang gikatakda’ng relibuhan sa katungdanan ug ibalhin gawas sa probinsiya.
Kini ang gitug-an ni Senior Supt. Clifford Gairanod, direktor sa Cebu Provincial Police Office.
Ang tulo ka hepe ang lahi usab kini sa laing 11 nga ilahugay sa pwesto apan magpabilin lang sa probinsiya.
Sumala pa ni Gairanod nga angayan lang nga ibalhin gawas sa probinsiya ang tulo aron kini maghatag og leksiyon sa uban nga dili magsalig nga magpabilin ra gihapon sila sa Sugbo.
Wala na hinuon gitug-an ni Gairanod kung asa nadestino ang mao’ng mga hepe.
Gusto usab ni Gairanod nga matag hepe sa kapolisan masayud gyud kung unsa ang lihok sa iya tanang sakop ilabina kadtong nalambigit sa pagprotektar sa drugas.
Apan sa dili pa relibuhan ang maong mga hepe, ipatawag una ni Gairanod ang mga imbestigador sa Provincial Intelligence Branch ug Provincial Investigation Detection and Management Branch.
Ang mahimong hukom sa ilang panagtagbo mao’y ipasa ni Gairanod nga rekomendasyon ngadto sa direktor sa Police Regional Office-7 alang sa hingpit nga pagpatuman.
Gusto ni Gairanod nga makita sa mga hepe nga seryoso kini sa iyang plano kabahin sa mga polis opisyal nga nakita nga relax lang sa trabaho ug kadtong mga wala nakatuman sa nauna’ng mga mando ilabi na sa pagpakigbatok sa drugas. (BANAT NEWS)