Nakabangga nga driver naa sa VSMMC
CEBU, Philippines - Giklaro ni Senior Superintendent Arnel Amor Libed, director sa Lapu-Lapu City Police Office, nga wala niikyas ang drayber sa usa ka pribadong dump truck nga nakabangga og duha ka sakyanan sa gobiyerno sa tiilan sa Marcelo Fernan Bridge sa niaging Miyerkules sa gabii.
Gitataw ni Libed nga si Pablo Estrera kinsa taga Bogo City ug temporaryong nagpuyo sa Dakbyan sa Mandaue, ang anaa pa sa Vicente Sotto Memorial Medical Center ug gibantayan og polis.
Unang niingon si PO2 Jobin Pino sa LCPO-Traffic Management Unit, nga wala namatay si Estrera ug ila kining gibalhin sa VSMMC gikan sa Chong Hua Hospital.
Alas 8 sa gabii sa Miyerkules nagub-an sa brake ang gimaneho’ng dump truck ni Estrera dulhog sa ubos sa taytayan ug deretso nga nabangga sa multicab ug dump truck sa Department of Public Works and Highways.
Usa ang patay ug unom ang naangol nga mga trabahante sa DPWH sa maong insidente.
Ang kauban ni Estrera nga si Raymond Ediza, 18, taga Batbangon, Leyte ug kasamtangang nagpuyo sa Tunghaan, Minglanilla, ang naangol usab.
Ang DPWH ug ang kapolisan mopasaka og kaso batok ni Estrera.
Matud ni Police Senior Inspector Zenaido Pastorfide, hepe sa LCPO-Homicide Section, nga mahimo usab nga mopasaka og kaso ang kagamhanan sa Dakbayan sa Lapu-Lapu human naguba ang railings sa center island sa karsada. (BANAT NEWS)
- Latest
