Mga trabahante giharos

CEBU, Philippines - Pasakaan og kaso sa Department of Public Works and Highway (DPWH)-7 ang drayber sa dump truck nga miharos sa ilang mga trabahante nga niresulta sa kamatayon sa usa ug pagkaangol sa lain pang mga trabahante ug kadaot sa gamit sa gobiyerno diha sa Marcelo Fernan Bridge sa nakalabay nga gabii.

Si Assistant District Engr. Renult Ricardo miingon nga ilahang kasohan og reckless imprudence resulting to homicide and multiple injuries and multiple damaged to properties ang suspek nga si Pablo Estrera, 37 anyos, taga P. Rodriguez St. Cogon, Poblacion, Dakbayan sa Bogo.

Si Estrera maoy driver sa dump truck nga adunay plaka nga AGA- 6655 nga nakapangalan ubos sa Sound Machinery and Diesel Part Inc. nga matud pa sa report sa dyLA giingong gipanag-iya sa usa ka politiko sa Leyte.

Ang maong trak nawad-an og brakes samtang nagdulhog sa Marcelo Fernan Bridge ug nadumbolan ang usa ka multicab sa DPWH nga adunay plate number nga SKK- 652 nga gimaneho ni Ricardo Booc.

Si Booc namatay human makaangkon og grabeng kadaot sa kalawasan tungod sa pagharos sa maong trak. Gawas sa multicab, naharos usab ni Estrera ang ubang trabahante sa DPWH nga sila si Marlon Katam-isan, Raymundo Peñaranda, Joselito Cruz ug Robincio Tugap.

Sa pagkakaron giabaga sa DPWH ang galastuhan sa tambalanan sa ilang mga trabahante nga naangol ug ang burial assistance sa namatay. Gipasabot ni Ricardo, ni-overtime ang ilang mga trabahante alang sa pag-patching sa potholes sa kadalanan.

Siya midugang kompleto sila og safety measures sama sa pagbutang og barikada ug aduna silay traffic aide aron lang gyud malikay sa disgrasya ang ilang mga kawani.

Iyaha usab giawhag ang mga motorista nga batasanon gyud pag-check ang ilang mga sakyanan sa dili pa mobiyahe aron malikay sa aksidente.

Si Estrera dali usab nga gidala sa tambalanan human napiit diha sa sakyanan atol sa panghitabo. Gihulagway sa mga nakakita nga  kusog nga nagdulhog ang maong dump truck ug una kining nadasmag sa lamp post dayon sa multicab diin naglingkod sa atubangan nga bahin si Booc.

Giklaro ni  Police Officer 2 Jobin Pino, imbestigador sa Lapu-Lapu City Police Office- Traffic Management Unit nga wala namatay ang driver nga si Estrera.

Matud niya, unang gidala sa Chong Hua Hospital si Estrera apan gibalhin kini sa Vicente Sotto Memorial Medical Center apan sa pag-adto didto sa maong tambalanan kagahapon sa kaadlawon  wala nila kini makit-i didto. (BANAT NEWS)