CEBU, Philippines - Naangol ang polis ug menor de edad sa managlahing disgrasya sa kadalanan sa Lungsod sa Santander ug Asturias.
Sa aksidente sa motorsiklo nga nahitabo sa Barangay Pasil, Santander kagahapon, giila ni Police Inspector Abell V. Laborte ang biktima nga si Police Officer 1 Mark Quiamco, taga Panadtaran, San Fernando.
Matud ni Police Officer 2 Antonio Belemco nga nagmaneho og usa ka motorsiklo si Quiamco paingon sa Liloan Port sa Santander aron sa pag-duty sa iyang unit assignment sa Regional Public Safety Batallion 18 sa Nagbagang, Santa Catalina, Negros Oriental.
Nawad-an og kontrol ang motorsiklo dihang naigo og gagmay’ng bato sa dalan ug nadalin-as.
Nakaangkon og samad sa nagkadaiyang parte sa lawas ang biktima ug gihatud sa tambalanan.
Samtang naangol ang 16-anyos nga lalaki human nalagpot sa gisakyan nga traysikol sa Old Bago, Asturias.
Ang traysikol nga gimaneho ni Giovanni Rodriguez Panunciar, 26, residente sa Barangay Poblacion, paingon sa Old Bago gikan sa Sta. Lucia National High School diin nisakay ang biktima.
Giingong nitakilid ang traysikol dihang nakaagi og dakong bato sa dalan ug nalagpot ang menor de edad nga sakay.
Nakaangkon og mga samad ug pangos sa lawas ang biktima ug nalandig sa tambalanan samtang nitahan sa kapolisan si Panunciar. (BANAT NEWS)