PWD lane sa eleksiyon lisud
CEBU, Philippines - Lisud pa himuon ang pagbutang og buwag nga presinto sa pagbotar sa mga persons with disability (PWD) atol sa adlaw sa eleksiyon.
Matud ni Provincial Election Supervisor, Atty. Lionel Marco Castillano, nga limitado kaayo ang ila’ng mga sakop samtang 800 ka botante ang gidaghanon sa matag presinto.
Iyang gipasabot nga ang gidaghanon sa mga PWD dili maka-justify nga makahimo og lahi nga presinto alang kanila.
Ang gidaghanon sa PWD sa Dakbayan sa Sugbo ubay-ubay apan sa kalungsuran diyutay lang.
Matud ni Castillano nga dili usab pwede nga ang mga botante sa usa ka barangay itipon sa laing barangay.
Sugyot ni Jerry Ursaiz, presidente sa PWD Federation sa Lungsod sa San Remigio ug kanhi presidente sa Provincial PWD, nga ilakip sa PWD lane ang mga senior citizens ug mga mabdos.
Si Castillano nipasalig nga pangitaan nila og paagi nga dunay mo-ayuda sa mga PWD inig botar nila. (BANAT NEWS)
- Latest
