CEBU, Philippines - Mas kahadlokan ang dengue kun itandi sa nabaniog karong Zika virus nga nigrabe na kadaghan ang kaso didto sa nasud sa Brazil sumala pa sa hepe sa Provincial Health Office sa Lalawigan sa Sugbo.
Sumala ni Dr. Cynthia Genesolango, ang provincial health officer sa lalawigan, ang Zika virus parehas og mga sintomas sa dengue sama sa hilanat ug panakit sa lutahan ug uban pa.
Apan giklaro ni Genesolango peligro kaayo ang maong virus alang sa mga mabdos tungod kay ang atakihon sa kagaw mao ang utok sa gisabak.
Sama sa dengue, ang Zika virus mapasa sa tawo kun kini mapaakan sa lamok nga Aedes Aegypti. Hinuon, wala pay kaso sa Zika virus dinhi sa Sugbo nga natala sa pagkakaron.
Gawas sa direktang mapaakan sa lamok nga nagdala sa maong virus, nasuta usab nga makatakod kini pinaagi sa pakighilawas kun ang usa kanila natakboyan na sa maong kagaw.
Hinuon gihulagway sa mga doktor nga mas angayang kahadlokan sa mga tawo ang dengue virus tungod kay makamatay kini.
Ang Department of Health-7 ning bag-ohay lang mibutyag nga ang mga tawong matakboyan sa Zika maayo ra sud sa duha ka semana. Apan lahi ang epekto niini ngadto sa mga gimabdos kay mogamay ang ulo sa bata ug di ma-develop ang ilang utok. Kun mabuhi man, dili kini modugay ug mamatay ra gihapon.
Sa laing bahin, gisusi sa Provincial Health Office ang gikatahong kaso sa Zika virus nga natala sa Sugbo pipila ka tuig ang nakalabay.
Sumala ni Genesolango,gusto nilang masubay ang kahimtang karon sa maong batan-on nga giingong adunay history sa pagbiyahe sa mga nasud nga aduna karoy natala nga mga kaso sa Zika virus. (BANAT NEWS)