Policewoman paimbestigahan

CEBU, Philippines - Paimbestigahan sa Police Regional Office-7 ang policewoman kansang inahan ug igsuon gipatay sa iyang uyab nga tomboy sa miaging adlaw diha sa Brgy. Ulbohan sa Lungsod sa Calape.

Si Senior Superintendent Rey Lyndon Lawas ang deputy chief for operations sa PRO-7  miingon nga ilang susihon ang report nga ang Glock 17 pistol nga gigamit sa suspek nga si Maricel Ramos gikan sa uyab niining polis nga si PO1 Rosalie Cuario.

Si Ramos mipusil patay sa inahan ug igsuon ni Cuario nga sila si Rosita Cuario, 74, ug Joel Cuario, 45, ug miangol sa lain pang igsuon sa maong policewoman.

 Si Ramos napatay usab sa kapolisan atol sa hot pursuit operation. Gituohan nga nangabubho ang suspek niadtong tungora ug ang gipahimungtan mao ang mga biktima.  Gusto usab ni Lawas nga masubay kun adunay mga papeles ang maong armas tungod kay kalapasan sa balaod ang paghatag og armas nga walay lisensya.

Ang maong armas ang giingon nga nadaog ni Cuario sa usa ka contest sa Bohol Provincial Police Office ug gikatahong iyang gihatag ni Ramos.

“A firearm should not be released to any person even in a gun store unless it is licensed,” matud pa ni Lawas. Si PO1 Cuario sa iyang bahin misaway sa mga kaubanan kay matud niya “over kill” ang gihimo nila kang Ramos. Si Lawas gusto usab nga mopasusi sa maong pasangil. Apan ang hepe sa Calape Police Station nga si Sr. Insp. Cresente Gurrea nga nahinabi sa Banat News miklaro nga dili over kill ang nahitabo ni Ramos kay igo ra silang mibawos dihang sila unang gipusil sa suspek. Andam  usab sila nga moatubang sa imbestigasyon. (BANAT NEWS)