CEBU, Philippines - Nikabat na sa P50 milyones ang natigum sa Piso Para sa Misa ng Buong Mundo nga gisugdan niadto’ng Hulyo 2014 hangtud sa una’ng adlaw sa bag-ohay lang nahuman nga 51st International Eucharistic Congress sa Dakbayan sa Sugbo.
Matud ni Fr. Charles Jayme, ang coordinator sa PPMM, nga nagpadala na sila og suwat sa tanang Archdioceses ug Dioceses nga mo-remit na sa katapusang sulod sa donasyon sa ila’ng mga donation boxes ug lakip sa ila’ng mga report aron masusi kung nitakdo ba kini sa report nga ila’ng gihuptan
Sumala pa ni Jayme nga mosaka pa ang mao’ng kantidad kay magpaabot pa man sila hangtud sa katapusang adlaw sa buwan sa Pebrero.
Dugang ni Jayme nga sa P50 milyones, nag-una ang Manila sa donasyon nga niabot og P13 milyones ug gisundan sa Sugbo nga niabot sa P11milyones.
Gibutyag ni Jayme nga adunay mga simbahan sa Sugbo nga naghatag og P200 mil ngadto sa tunga sa milyon ka pesos sama sa Cebu Metropolitan Cathedral, Sto. Rosario Parish, St. Therese Lahug, San Narciso Parish-Consolacion, St. Joseph-Mandaue City, Santo Tomas de Villanueva Parish-Pardo, Cebu City; Sto. Niño Parish-Mojon, Talisay; Our Lady of Lourdes-Punta Princesa, Our Mother of Perpetual Help Parish-Redemptorist, San Isidro Labrador Parish-Talamban, Blessed Sacrament Parish-North Reclamation Area ug Basilica Minore del Sto. Niño.
Mapasalamaton si Jayme sa tanang tawo nga nipaambit ug nihatag sa ila’ng donasyon sa Piso Para sa Misa ng Buong Mundo nga nakatabang sa mga galastuhon sa 51st IEC. (BANAT NEWS)