CEBU, Philippines - Ang gikan lang sa Dakbayan sa Lapu-Lapu ang makaagi sa Mandaue-Mactan Bridge sugod sa Lunes, Pebrero 8, nunot sa pag-ayo nga himuon sa Department of Public Works and Highways.
Sirad-an ang usa ka lane sa taytayan hinungdan nga ang mga motorista paingon sa Dakbayan sa Lapu-Lapu adto una paagion sa Marcelo Fernan Bridge.
Gumikan niini, si Lapu-Lapu City Mayor Paz Radaza nipahimangno sa publiko ilabi na kadto’ng paingon sa siyudad ug sa tugpahanan sa Mactan nga mosayo aron dili mapiit sa grabe’ng trapik.
“Ato lang gi-advise ato’ng riding public nga mosayo if they go straight to the airport, and we might be introducing nga ari lang gyud ang going to the airport from the first bridge they go straight here at the back sa Matumbo straight to the airport,” matud ni Radaza.
Himuong 24/7 ang pagtrabaho sa taytayan aron mapadali ang paghuman.
Awhag usab ni Radaza sa mga mopaingon sa Dakbayan sa Sugbo nga kun mahimo mosakay na lang og ferry boat sa Muelle Osmeña luyo sa simbahan sa Birhen sa Regla paingon sa Pier 3 aron dali’ng maabot sa destinasyon.
Nanghinaut ang DPWH nga masabtan sa publiko ang ila’ng pagtrabaho.
Moabot sa 320 ka adlaw ang pagtrabaho sa P129 milyones nga proyekto sa pag-ayo sa taytayan. (BANAT NEWS)