CEBU, Philippines - Gipangita sa konseho sa Dakbayan sa Talisay kung hain na ang kontrobersiyal nga P3.5 milyones nga rescue vehicle human wala na igkita sa compound sa City Hall. Si Konsehal Danny Caballero niduso og resolusyon nga naghangyo kang Mayor Johnny de los Reyes sa pagbutang og opisyal nga garahian sulod sa compound sa City Hall labi na ang mahalon nga rescue vehicle ang wala na nila makita sukad sa hinapos sa tuig 2015.
Buot ang konsehal nga sa City Hall ibutang ang sakyanan sanglit naa nahimutang ang Bureau of Fire Protection, Talisay Rescue Emergency Assistance Team (TREAT) ug ang Local Disaster Risk Reduction and Management Office nga maoy moresponde sa alarma.
Si Bise Mayor Romeo Villarante nikompirmar nga wala na nila igkita ang rescue vehicle. Nahimong kontrobersyal ang rescue vehicle nga gihulagway sa Commission on Audit nga mahal ra. (BANAT NEWS)