Konsehal nakaeskapo, 18 sikop sa shabu

CEBU, Philippines - Nakaeskapo ang usa ka konsehal sa barangay sa ronda sa pagpamaligya og shabu sa Poblacion, Lungsod sa Dalaguete pasado alas 9 sa nakalabay nga gabii.

Ang nakaeskapo mao si Jenemar Heredia, konsehal sa Barangay Balud ug nag-abang og balay sa Poblacion.

Matud ni Senior Insp. Dexter Basirgo, hepe sa Dalaguete Police Station, nga tuig 2012 nibisita pa sa iyang buhatan si Heredia aron limpyohan ang iyang pangalan sa pasangil nga nalambigit kini sa negosyo sa drugas.

Human nabalhin sa Lungsod sa Boljoon si Basirgo, ang opisyal nakadungog og mga estorya nga mas nigrabe pa ang negosyo ni Heredia sa drugas.

Dihang nabalik pagka-hepe sa Dalaguete si Basirgo, subli nila nga gipaubos sa surveillance ang konsehal ug gikuhaan og search warrant nga gisilbi sa nakalabay nga gabii.

Gumikan kay sudlonon og daghan usab nga spotters sa gawas sa balay sa konsehal, abtik kini nga nakasibat agi sa likod sa iyang balay.

Sulod sa lawak sa konsehal, narekober sa kapolisan ang daghang pinakete sa shabu nga nikantidad og kapin sa P120,000 ug tapad sa mga shabu ang identification card sa konsehal sa League of Barangay Councilors.

Nasikop ang iyang bata-bata nga si Jimmy Dale Legazpi ug usa ka Vincente Bella nga nipasangil nga naabot lang kini sa maong balay aron mag-ayo og motorsiklo.

Si Basirgo nihulagway ni Heredia nga usa ka “level 3 drug pusher” kinsa kaniadto sa iyang pagbiya sa Dalaguete usa pa lang kini ka “pating” apan karon sa iyang pagbalik nahimo na hinuon kini nga usa ka “iho” ug gitawag na og “kumander bossing”.

Gawas sa konsehal, tuyo usab sa kapolisan ang igsuon nga si Janine nga wala sa balay atol sa ronda.

Gipasabot sa hepe nga gawas ni Heredia wala usab niini gipadaplin ang posibilidad nga aduna pa’y laing mga politiko sa ilang lungsod ang nalambigit sa negosyo sa shabu.

Sa Liloan, usa ka Sarah Mae Lufranco, hingkod nga taga Bagacay, Catarman ang nasikop ug nakuha ang 320 ka paketeng shabu nga mokabat sa P177,000 uban sa P1,100 nga salapi nga gituohang halin.

Ang kapuyo nga si Richard Rivera ang dali kaayong nakasibat samtang nasakmitan og armas nga kalibre .45 si Alfonso Tagalog, 40, ug nakuhaan usab og 10 ka gagmay nga pakete sa shabu.

Mokabat usab sa P173,224 nga kantidad nga shabu ang nasakmit sa usa ka Mylene Valdez, 27, taga Cadaohan, Talamban, Dakbayan sa Sugbo atol sa buy-bust operation sa Pulpogan, Consolacion alas 8 pasado sa niaging gabii.

Sa laing bahin, ang suspek sa pagpangawat og manok nga si Michael Bernardo Gibon Jr., 23, taga Purok Uno, Cubacub, Dakbayan sa Mandaue, ang nakuhaan og medium-sized nga pakete sa shabu atol sa pagrekisa human kini gidakop ug gidala sa Consolacion Police Station sa niaging adlaw.

Samtang sa Highway Looc, Dakbayan sa Danao, nadakpan ang 10 ka tawo nga naaktuhan sulod sa payag nga nagsuyop og shabu ug nasakmitan og tagsa ka pakete’ng shabu ug mga drug paraphernalia.

Ang mga dinakpan naila nga sila si Emiliano Patiluna Jr., 28; Leonico Camanse, 27; Ryan Seronobes, 35; Lemuel Lucero, 21; Nigel Regedor, 23; Aldrin Nuñez, 27; Arvin Sanico, 27l Reynold Camanse, 25; Tomas Labador, 26 ug Apolonio Capules, 53, pulos nagpuyo sa mao’ng dapit.

Samtang ang kapolisan sa Dakbayan sa Talisay nga nitubag og alarma sa armado’ng tawo sa Tunga St., Barangay Tanke ang nakadakop og tulo ka tawo nga nag-andam og drug paraphernalia nga usa ka rolyo sa tin foil, usa ka tissue rim ug usa ka lighter.

Ang mga dinakpan mao sila si Reynan Racasa Cañeda, Mark Gabanez Labita ug Roxannie Abarquez Roxal. (BANAT NEWS)