CEBU, Philippines - Nibalibad ang The Church of Jesus Christ of Latter-day Saints o naila nga Mormons sa hangyo ni Mayor Michael Rama sa pagpasibog sa koral sa ilang simbahan sa Salinas Drive, Lahug, Dakbayan sa Sugbo.
Hinungdan nga gihangyo usab ni Rama si Church Legal Council, Atty. Victor Taylor, nga mouban o mosuway og walk-through uban niya.
Gisugdan karon ang pagpalapad sa karsada sa Salinas Drive ug Gorordo Avenue aron maluag sa trapiko.
Matud ni Rama nga personal siya nga nihangyo sa kadagkuan sa simbahan tungod kay dili siya gusto nga moabot pa sa korte nunot sa proyekto sa gobiyerno.
Una na nga niboluntaryo sa pagguba ang 12 ka establesemento isip suporta sa proyekto sa kagamhanan.
Si Rama personal nga nakigtagbo sa kadagkuan sa Mormons niadtong Biyernes. (BANAT NEWS)