CEBU, Philippines - Kanhi polis nga mikandidato pagka konsehal sa lungsod sa Sogod ang gisikop sa mga polis human kini nalutsan og warrant of arrest sa kasong murder diha sa Barangay Tabunok sa maong lungsod niadtong nakalabay nga buntag.
Ang dinakpan mao si James Arche, alyas Puyat, 54, taga barangay Poblacion sa maong lungsod.
Sumala pa ni Police Officer 2 Raymond Bacordo sa Sogod Police nga nahinabi sa Banat News, gidakop si Arche human nakakuha sila og warrant of arrest sa kasong murder nga gi-isyu ni RTC Judge Torobio Quiwag, Branch 27 sa Dakbayan sa Lapu-lapu.
Matud pa ni Bacordo nga katapusang nadestino sa pagka polis si Arche diha sa Lapu-Lapu Police ug tuig 1999 kini nahunong sa serbisyo.
Human nakadawat og kopya sa warrant ang kapulisan, usa ka impormante ang mitug-an sa mga polis nga nasigpatan sa barangay Tabunok ang kanhi polis nga sakay sa usa ka motorsiklo hinugdan nga ila usab kini nga girespondehan.
Hinoon human gipakitaan sa warrant of arrest si Arche boluntaryo usab kini nga mikuyog sa kapulisan.
Si Bacordo miingon nga ang kaso ni Arche nahitabo sa dihang sakop pa kini sa kapolisan sa siyudad sa Lapu-Lapu ug sa iyang nasayran nahulog sa kasong homicide ang giatubang ni Arche apan murder ang migawas nga warrant. (BANAT NEWS)