Maternity house nanirado

CEBU, Philippines - Nagpaabot karon ang Department of Health (DOH)-7 nga mopadala og komunikasyon ang Cebu Puericulture Center and Maternity House, Inc. labot sa ilang temporaryo nga pagsira sa maong tambalanan tungod sa kasungian sa management ug mga kawani.

Matud ni Dr. Sophia Mancao, Assistant Regional Director sa DOH-7 kinahanglan mosubay sa protocol ang tambalanan aron mahibaw-an kun angay na bang kanselahon ang ilang license to operate.

Sigon ni Mancao, nahibawo lang ang ahensiya nga mihunong na sa pag-operate ang tambalanan niadto lang Enero 28  tungod sa tarpaulin nga nakapaskin sa gawas nga bahin niini.

Gipatawag na hinuon nila ang atensiyon sa management sa tambalanan ug ilaha na lang gipaabot ang tubag niini aron pagkumpirmar sa estado sa ilang operasyon.

Nasayran nga ang nagpadayong kasungian sa mga kawani niini ug sa management maoy gihimong rason sa temporaryo nga pag-undang sa ilang operasyon. Si Atty. Cornelio Mercado, abogado sa Maternity House nga nahinabi sa Banat News miingon ang mga doktor sa maong tambalanan dili ganahan motrabaho gumikan sa maong kasungian.

Nabalaka sila basin nga adunay mahitabong sabotahe ug mas delikado usab nga mapagan o maapektuhan usab ang mga pasyente.

Hinoon, giklaro niya nga dili problema ang kwarta sanglit ang ilahang tumong karon mao nga masulbad ang maong problema tali sa mga empleyado nga mipadala na og notice to strike.

Gani, matud sa manlalaban, kadtong mga nakabayad sa package deal sa tambalanan unya wala pa masugdi ang paghatag og serbisyo ilang ulian sa ilang nabayad, apil na niini kadtong nagpa package deal.

Apan si Fundador Alforque, Vice-President sa Cebu Maternity Hospital Employees Independent Union-ADLU-KMU, nagkanayon dili makiangayon nga sila maoy basolon sa pagsira sa ospital.

Matud niya apektado gyud silang mga trabahante sa gihimong lakang sa management, lakip usab ang ilang mga pasyente.

Nasayran nga ang ilang unyon, nihimo og proposal labot sa umento sa ilang suhulan nga P20 -P25 kada adlaw pinaagi sa Collective Bargaining Agreement (CBA) sa miaging tuig.

Apan mibalibad niini ang management ug mi-counter offer lang kini og piso nga umento hinungdan sa ilang pag-strike.

Padayon pa hinoon ang ilang gihimong sabot-sabot labot niini ngadto sa National Conciliation and Mediation Board (NCMB).

Apan matud ni Alforque, bisan sa temporaryong paghunong sa operasyon sa tambalanan magpadayon gihapon  sa pagtrabaho ang mga kawani bisan walay kasigurohan kun sila masweldohan.

Si Mercado midugang nga kun moingon ang NCMB nga pahatagan og sweldo ang mga trabahante nga padayong nitrabaho bisan og sirado walay mahimo ang Maternity House apan sa pagsunod sa mando.

Nasayran nga dunay moabot sa 140 ka mga trabahante ang maong tambalanan. (BANAT NEWS)