CEBU, Philippines - Pipila ka pilrims ang niabot sa Sugbo aron lang pagtambong sa mga misa sa 51st International Eucharistic Congress (IEC).
Si Maurcia Torillo, 55-anyos, taga Loay, Bohol, nga kuyog sa iya’ng bana ug duha ka anak nga babaye, niingon nga ang pagtambong lang gyud sa mga misa ang ila’ng tuyo.
Matud niya nga nag-una siya ug ang iya’ng bana sa pag-anhi sa Sugbo niadto’ng Enero 24 sa buntag ug nakatambong sila sa misa sa pagbukas sa IEC sa Plaza Independencia.
Nakatambong usab sila’ng magtiayon sa misa sa atubangan sa Kapitolyo ug nakasalmot sa solemn procession padulong sa Plaza Independencia.
Ang ila’ng duha ka anak nga babaye nga pulos magtutudlo sa publiko’ng tunghaan sa ila’ng dapit niapas nalang sa pagtambong usab sa misa sa South Road Properties.
Gitataw ni Mrs. Torillo nga sa iya’ng pagtambong sa misa wala gyud siya’y laing gi-ampo sa Ginoo kun dili mao lang ang kanunay nga kabaskog sa panglawas sa tibuok pamilya.
Gi-ampo usab niya ang kalinaw ug ang paglikay sa katalagman human sa 7.2 magnitude nga linog sa niadto’ng 2013.
Susama usab ang giampo sa 61-anyos nga si Nicolas Morales nga taga Sabang, Dakbayan sa Danao sa iya’ng pagtambong sa misa sa IEC sa Kapitolyo.
Iya’ng gidugang ang kalinaw sa umaabot nga eleksiyon ug nga magmatinud-anon unta ang mga kandidato sa ila’ng pagsalmot sa politika. (BANAT NEWS)