CEBU, Philippines - Gireklamo sa usa ka barangay konsehal sa Jagobiao, Dakbayan sa Mandaue ang ilang kapitan kinsa giingong wala na igkita sa iyang buhatan sukad niadtong Nobiyembre.
Si konsehal Leo Alfred Forones pinaagi sa suwat nisumbong kang Mayor Jonas Cortes sa giingong absent without official leave (AWOL) ni Kapitan Editha Montesa.
Si Forones naghangyo usab kang Cortes sa pag-imbestigar kang Montesa.
Sa pagpakighinabi sa Banat News kang Forones, siya nagkanayon nga wala na nagpakita si Montesa sa ilang sesyon matag buwan sukad niadtong Nobiyembre hangtud karong buwana.
Matud ni Forones nga sa balay na mamirma si Montesa ug may problema kini sa panglawas. Apan si Montesa nihimakak sa pasangil ni Forones.
“Ngano man nga moingon man siya nga absent without leave nga nag-function man ko. I’m doing my capacity, wala’y nangreklamo nga dili na mobuhat ang kapitan,” matud ni Montesa.
Dugang ni Montesa nga naghatag siya og suwat nga dili siya maka-tambong sa sesyon tungod sa kakulian sa iyang panglawas ug si konsehal Gerardo Lim ang iyang gihatagan og katungod nga mopuli sa iyang pwesto ug kini giuyonan sa tanang konsehal.
Nagtuo hinuon si Montesa nga pamolitika ang gihimo ni Forones sanglit modagan kini sa pagka-kapitan sa sunod piniliay. (BANAT NEWS)