Duha ka dagkong sunog niulbo

CEBU, Philippines - Duha ka mga dagkong sunog ang milamoy sa kapin 30 ka mga balay diha sa Dakbayan sa Mandaue ug sa Dakbayan sa Lapu-Lapu kagahapon sa hapon ug sa kaadlawon.

Mokabat sa P250 mil ang danyos sa 20 ka balay nga naugdaw sa sunog sa Sitio Sto. Niño, Brgy. Guizo sa Dakbayan sa Mandaue nga nagsugod alas 2:10 ang takna kagahapon sa hapon.

Si Mandaue City Fire Marshal Joel Abarquez dali nga mipaubos sa Task Force Alpha (TFA) sa maong sunog ug sa paglabay sa 15 minutos pa nila nakontrolar.

Ang kabalayan sa lugar ginama sa mga light materials ug lisud sudlon ang dapit tungod sa kagamay sa dalan maong gisumpay-sumpay na lang nila ang fire hoses. Nahidangat ang uban pa nga mga bombero sa mga silingang dapit mitabang sa pagpawong niini.

Si Senior Fire Officer 4 Roy Garcia nga chief imvestigator sa BFP-7 miingon nga mohimo pa sila og dugang imbestigasyon sa pagsuta kun asa gikan ang kalayo. Hingpit kining napawong alas 3:15 na sa hapon. Samtang 17 ka panimalay ang naugdaw sa Purok Bayabas, Brgy. Canjulao sa Dakbayan sa Lapu-Lapu kagahapon sa kaadlawon.

Matud ni Fire Officer 1 Rouel Brañanola sa Lapu-Lapu City Fire District nga nahitabo ang sunog sa alas 12:10 sa kaadlawon gikan sa panimalay ni Gigi Estrer. Basi sa gipahigayon nga imbestigasyon nila ni Brañanola, “electrical misuse” ang hinungdan sa maong sunog. Ang mga balay ginama lang sa light materials maong dali kining mikatap. Nakontrolar kini paglabay sa siyam ka minutos ug nagbilin kini og P160 mil nga danyos.  (BANAT NEWS)