CEBU, Philippines - Mokabat sa 800 mil ka tawo ang gibanabana nga nanguyog sa prosesyon sa 51st International Eucharistic Congress kagabii human sa misa nga gipahigayon atubangan sa Kapitolyo.
Base sa report sa Cebu City Command Center nga alas 6:30 palang sa gabii gikan sa ulo sa prosesyon sa dalan Plaridel eskina Osmeña Boulevard hangtud sa ikog nga nahimutang sa Fuente Osmeña Rotunda, gibana-bana’ng sobra sa 200,000 ang gidaghanon sa nikuyog.
Apan pasado alas 8:00 sa gabii, ang ground commander sa prosesyon nga si Chief Inspector Ryan Devaras nibanabana nga niabot na sa kapin 800,000 ka tawo.
Nabantayan nga ang ubang mga tawo mosal-ot na diha sa kadalanan gikan sa Kapitolyo lahos sa Plaza Independencia.
Si Most Reverend Diarmuid Martin, DD, sa iya’ng homiliya sa Holy Eucharist Mass sa Kapitolyo nipaambit sa mga kasinatian sa iya’ng duha ka superior sa Roma nga usa ka Polish Bishop ug Vietnamese Cardinal kinsa pareho’ng niagi og grabe’ng pag-antus tungod sa ila’ng pagtuo.
Sama sa ubang pari ug deacon, gidakop kini sa mga Nazi sa World War II tungod sa ila’ng pagtuo.
Ang duha ka Bishops bisan pa sa ila’ng kalisud nga naagian kaniadto padayon gihapon kini sa ila’ng pagsaulog sa Eucharist Mass.
Si Bishop Martin nagkanayon nga nag-ampo siya nga ang Eucharistic Congress makahatag og oportunidad sa tanan sa pag-renew sa kagutom ug kauhaw sa Eucharist ug masabtan kung unsa ka importante sa Eucharist (Eukaristiya) sa kinabuhi sa tanan.
Lakip sa homiliya ni Bishop Martin nga sa Eucharist gitawag kita sa pagsabot, paghigugma ug pagsunod sa kinabuhi ni Hesukristo.
Dugang niini nga kung si Hesus nagsakripisyo buot usab pasabot niini nga ang ato’ng kinabuhi kinahanglan usab nga magsakripisyo.
Ug si Hesus nagpalansang sa krus alang sa pagluwas sa tanan buot pasabot usab niini nga dili usab kini pwede’ng magpuyo nga alang lang sa ato’ng kaugalingon ug wala’y pakabana sa uban. (BANAT NEWS)