CEBU, Philippines - Giklaro sa Philippine Atmospheric, Geophysical and Astronomical Services Administration (PAGASA) nga wala’y bagyo kun dili uwan ug kusog nga hangin lang ang nasinati karon nga dala sa hanging amihan.
Matud ni PAGASA-Mactan Director Oscar Tabada nga magpabilin ang pag-uwan ug kusog nga hangin hangtud karong Domingo nga mao usab ang panapos nga misa sa International Eucharistic Congress (IEC) sa South Road Properties.
Dugang ni Tabada nga karong hapon makita na ang adlaw apan dili kini kaayo init ug hangtud na sa Sabado sa udto ug mo-uwan pagbalik sa hapon.
Sa Domingo usab masinati ang init sa buntag apan mag-uwan-uwan kini og ginagmay sa hapon.
Gihangyo ni Tabada ang katawhan ilabi na kadtong buot moapil sa misa sa SRP nga magdala og tubig nga mainom ug pandong.
Giawhag usab ni Tabada ang tanang local government units sa Sugbo nga kanunay nga mangandam ug mag-monitor sa ilang lugar ilabi na gyud kadtong mga dapit nga “landslide prone”.
Samtang si Cebu City Disaster Risk Reduction and Management Office (CCDRRMO) head Konsehal Dave Tumulak niawhag sa bukirang barangay nga dili mokompiyansa ug padayunon ang pag-monitor sa ila’ng mga dapit ilabi na gyud ang mga prone sa landslide.
Dugang hangyo ni Tumulak sa mga opisyal sa barangay ang pag-andam sa ilang evacuation center ug sa mga heavy equipment kun ugaling adunay kalit nga peligro nga mahitabo sa tagsa-tagsa ka barangay.
Kasamtangang gi-monitor ang Barangay Sapangdaku, Buhisan, Pamutan, Binaliw, Sirao, Kantipla ug Sudlon II.
Hinuon sayo gahapon sa buntag wala’y natala nga pagdahili sa yuta gikan sa mga bukirang barangay hinuon aduna’y mga gagmay nga kanal ang nibaha apan dali ra kini nga narespondehan. (BANAT NEWS)