CEBU, Philippines - Mabulokon ang gihimong parish encounter tali sa mga delegado ug nagkadaiyang parokya dinhi sa Sugbo kagahapon nga naglakip sa katorse ka mga parokya sa Dakbayan sa Sugbo ug ingon man sa Lapu-Lapu ug Mandaue.
Kini nga kalihokan kabahin gihapon sa 51st International Eucharistic Congress nga diin ang mga delegado ug ang mga nagkadaiyang parokya nagkahimamat ug nagbinayloay og mga kasinatian sa ilang pagpuyo sa Eukarestiya. Sa Archdiocesan Shrine of San Roque Mambaling, gipangandaman og maayo sa siyam ka mga sona ang kalihokan nga gipatukoran gyud nila og tagsa ka payag nga adunay nagkalain-laing pagkaong Pilipino alang sa mga bisita ug sa mga nanambong.
Samtang sa Sto. Rosario Parish, ang mga Canadian, American, ug local delegates maoy miduaw kanila ug duha kanila ang nipaambit sa ilang kasinatian may kalabutan sa eukarestiya ug sa simbahan. Didto sa Archdiocesan Shrine of Our lady of Lourdes gisugat og rondalya ang mga bisita, samtang sa Our Lady of Guadalupe usa ka Sinulog dance gikan sa Banauan Festival ang nisugat sa mga delegado.
Samtang sa Dakbayan sa Lapu-Lapu nag-andam og boodle fight isip welcome dinner sa mga delegado ang mga parokya diha sa giandam nilang mga tolda. (BANAT NEWS)