CEBU, Philippines - Laing mga hepe sa kapulisan sa probinsya sa Sugbo ang gikatakdang maigo sa paglahugay inig human sa kalihokan sa International Eucharistic Congress sumala pa sa direktor sa Cebu Provincial Police Office, Senior Superintendent Clifford Gairanod.
Matud pa niya sobra sa napulo ka mga hepe sa kapulisan ang maigo sa maong paglahugay tungod gihapon sa ilang pagmika sa trabaho ilabi na sa kampanya batok sa ilegal nga drugas.
Sumala pa ni Gairanod nga may pagtugot sa Commission on Elections pinaagi ni Atty. Lionel Castillano ug ang director sa Police Regional Office-7.
Gusto usab niyang makaestorya ang mga mayor sa mga lungsod nga maapektahan aron sila pasabton sa iyang gihimo.
“I am not joking with them, sa una kasi ‘yun yung panghadlok nga ilabay diri, ilabay didto, until now wala gihapon nabuhat, so siguro within this week,” pasabot pa ni Gairanod.
Una nang naigo sa lahugay ang onse ka mga lungsod nga naglakip sa Alcantara, Ronda, Pilar, Barili, Carmen, Compostela, Oslob, Samboan, Tabuelan, Tudela ug hepe sa dakbayan sa Toledo. (BANAT NEWS)