Anak ni JVR nalutsa’g warrant

CEBU, Philippines - Nalutsan og warrant of arrest sa kasong libelo ang anak ni Talisay City Mayor Johnny de los Reyes kagahapon sa hapon.

Ang maong kaso may kalambigitan sa gipasakang kaso ni kanhi kongresista Eduardo “Eddiegul” Gullas sa miaging tuig.

Hinuon daling nakabutang og piyansa si Clifford de los Reyes human siya gipresentar sa mga arresting officers nga sila si SPO1 Mikie Espina sa Talisay City Police Station ngadto sa korte.

Matud pang Espina, ang opisina sa mayor ang nitawag sa ilang buhatan ug nipahibawo nga molusot na ang warrant of arrest batok kang Clifford ug gusto kining magpakuyog og pulis ngadto sa korte.

Si Espina nagkanayon nga didto nila gipakigkitaan sa opisina sa mayor si Clifford ug milahos na sila sa Regional Trial Court Branch 66 sa sala ni Judge Jacinto Fajardo kinsa maoy nag-isyu niini ug mipiyansa og P80 mil alang sa temporaryo niining kagawasan.

Si Gullas nipasaka og kaso batok ni de los Reyes human siya gipasanginlan niini nga nakakwarta sa merkado sa Tabunok. (BANAT NEWS)