CEBU, Philippines – Giawhag sa kadagkoan sa Department of Labor and Employment (DOLE) si Acting Cebu City Mayor Edgardo Labella nga kadtong mga balay patigayon nga nalambigit og contracting ug sub-contracting, kinahanglan unta nga pangitaan sila og certificate of registration sa dili pa sila hatagan og permit.
Si DOLE-7 Regional Director Exequiel Sarcauga mitataw nga ang pag-require sa mga hingtungdang magpapatigayon og DOLE certificate of registration gilatid kini sa Section 15 sa Department Order No. 18-A nga giisyu sa Department of Labor and Employment.
Human madawat ni Labella ang suwat gikan sa DOLE, ang acting mayor sa dakbayan sa Sugbo mihimo dayon og kamandoan ngadto kang City Treasurer Diwa Cuevas nga ipatuman ang lagda nga gibatbat ni Sarcauga.
Matud ni Labella nga angayang idugang sa mga requirement sa mokuha og permit ang DOLE registration certificate aron masiguro nga sila takus nga mosulod sa maong matang sa patigayon. (BANAT NEWS)