CEBU, Philippines – Miabot og 25 ka pamilya nga namuyo sa aseras sa kadalanan sa dakbayan sa Sugbo ang gipang-rescue sa mga kawani sa city hall nga nadestino sa gitawag og Sustainable Poverty Reduction and Economic Alleviation and Development (SPREAD) kaniadtong Lunes sa gabii.
Ang rescue operation gibase sa kamandoan ni Cebu City Acting Mayor Edgardo Labella nga miisyu og executive order nga nagmugna sa mao nga grupo, kang kansang tahas mao ang pag-rescue sa mga libud-suroy nga nagpuyo sa mga aseras.
Subay niini, ang mga kawani sa Department of Social Welfare Services (DSWS) ug ubang buhatan sa city hall nagtambayayong sa pagpang-rescue aron makapauli ang maong mga pamilya ngadto sa tagsa-tagsa nila ka mga lugar sa probinsya.
Gipaninguha usab sa SPREAD nga ma-monitor ang mga pamilya nga napapauli nila sa ilang mga dapit sa probinsya aron dili na kini mobalik pa sa siyudad.
Si Dr. Ester Concha, hepe sa Department of Social Welfare and Services (DSWS), miingon nga adunay mga pamilya nga dili na gustong mobalik pa sa ilang tagsa-tagsa ka probinsya.
Ang mga social workers mipasabot sa maong mga pamilya nga mahimong manginabuhi sila sa siyudad apan kinahanglan nga dili sila anha sa aseras mangatulog, ilabi na panahon sa kagabhion.
Matud ni Concha nga hatagan usa nila og panahon ang mga pamilya nga mopuyo sa temporary shelters nga anaa mahimutang sa karaang building sa Compania Maritima apan ila kining pasabton sa proyekto sa dakbayan.
Ang dakbayan sa Sugbo migahin og P2 milyones alang sa Comprehensive Program for the Street Families and the Badjaos.
Ang maong kantidad gamiton sa pagmugna og mga trainings ug mga livelihood programs para sa mga pamilya.
Apil sa mga aseras nga adunay mangatulog nga pamilya mao ang D. Jakosalem nga likud ra sa Cebu Metropolitan Cathedral. – /RUB) (BANAT NEWS)