CEBU, Philippines – Giawhag sa konseho sa Dakbayan sa Talisay si City Administrator John Yre de los Reyes, anak ni Talisay City Mayor Johnny de los Reyes nga mopanso pinaagi sa biometrics susama sa ordinaryong mga empleyado.
Kini human nila nasuta nga di kini mopanso sa iyang daily time record nga pagpamatuod nga nagtrabaho siya sa maong mga adlaw, apan nagdawatan gihapon kini og sweldo gikan sa kwarta sa mga Talisaynon. Laing awhag sa konseho mao ang pagtambong gyud niini sa flag raising ceremony uban sa mga empleyado sa City Hall.
Kagahapong adlawa atol sa session sa konseho, si Konsehal Danilo "Danny" Caballero niduso og duha ka managlahing resolusyon sa paghangyo sa mayor aron iyang sultihan ang iyang anak sa maong katuyoan. Matud pa ni Caballero nga si John Yre ra ang mohimo sa iyang daily time record ug papirmahan lang sa iyang amahan nga mayor.
Sigun pa niya nga base sa Civil Service Commission ang mga empleyado lakip na ang city administrators dili exempted sa biometrics gawas lang kun siya usa ka pinili nga opisyal sa gobiyerno.
Nagkanayon si Caballero nga dili maayong pamalandungon nga ang city administrator ang mopagawas og mga memorandum sa mga kawani bahin sa pagpanso apan siya mismo wa nituman niini. Giaprubahan sa mayoriya sa konseho ang resolusyon ni Caballero.
Ang Banat News nisuway pagtawag ug pag-text ni John Yre aron pangayoan kini og pamahayag bahin sa resolusyon sa mga konsehal apan ang maong opisyal ang wa motubag sa iyang telepono. – /EIM) (BANAT NEWS)