CEBU, Philippines – Buot ni Cebu City Acting mayor Edgardo Labella nga paimbestigahan ang kaso sa anak sa kapitan sa Brgy. Suba nga giingong nalambigit sa ilegal nga operasyon sa sugal diha sa maong dapit.
Matud pa ni Labella, ngil-ad bisan pa og anak sa usa ka opisyal sa gobiyerno ang malambigit sa ilegal nga kalihokan.
Dugang pa ni Labella nga bisag kinsa pa ang madakpan kinahanglan gayud nga imbestigahan ug lutoson sa balaod ilabi na og adunay ebidensiya.
Si Jomel Sable, anak sa barangay kapitan sa Suba nga kaalyado sa Team Rama apil sa nasikop sa kapolisan niadtong Lunes sa hapon sa illegal gambling. Nakuha sa kapolisan nga mga ebidensiya ang fax machines, tally sheets, stubs ug kwarta nga moabot sa P3,500 nga giingong gigamit sa operasyon sa “ilegal swertres.”
Si Association of Barangay Council President Philip Zafra sa iyang text message sa Banat News miingon nga pirme na niyang gipahimangnoan ang tanang kapitan sa ilang responsibilidad isip pangulo sa ilang tagsa-tagsa nga barangay nga unta maoy mangulo sa pagsunod sa balaod.
“I’ve been constantly reminding them on our duty to promote law and order and the moral responsibility to take the lead with utmost sincerity and dedication to public service,” matud pa ni Zafra.
Suway nga gikuhaan og habig ni Barangay Suba Kapitan Joel Sable Jr. apan dili kini makontak. – /EIM) (BANAT NEWS)