CEBU, Philippines – Ang mga sakop sa Cebu Provincial Board makig-alayon sa mga kapitan sa kabarangayan sa lalawigan sa Sugbo aron mas mapalapdan pa ang kampanya sa Kapitolyo batok sa cyber crime o cyber pornography.
Ang mga opisyal sa Kapitolyo nakigtambayayong usab sa kapolisan pinaagi sa ilang cyber crime division, ug ingon man sa kadagkoan sa National Bureau of Investigation (NBI)-7.
Si Probinsyal Board Member Sun Shimura, tsirman sa Committee on Peace and Order, maoy nangamahan pagduso og awhag sa mga kapitan ug mga opisyal sa barangay nga mohimo og lakang pag-ila sa mga tawo nga kadudahan og lihok nga nagpasiugda og cyber crime sa ilang hurisdiksyon.
Matud ni Shimura nga mas dali ra ang mga kapitan nga maka-monitor sa mga ilegal nga kalihokan sa ilang dapit.
Ang cyber pornography nisiaw na karon sa Sugbo kay usa kini ka matang sa kalihukan nga anha himoa sa pribadong dapit nga sagad mga langyaw ang gusto niini motan-aw sa mga menor de-edad nga maghubo atubangan sa webcam.
Gisugyot usab ni Vice Governor Agnes Magpale ang pagmugna og Provincial Anti-Cyber Crime Plan sa tuyo nga mas dali ang paggukod ug pagsuta sa mga tawo nga nagpasiugda sa cyber crime.
Gipahibawo ni Magpale nga ubay-ubay na ang nadakpan nga mga ginikanan nga maoy nisugo sa ilang mga anak nga mo-engage sa cyber crime bugti sa dakong kantidad nga bayad sa ilang kliyente.
Ang bayad ipaagi sa money transfer. Ang NBI 7, PNP-7, Provincial Prosecutors Office , DSWD-7 ug Kapitolyo nagkasabot nga magpadayon sa ilang tinguha pagsumpo sa cyber crime sa Sugbo.
Gibutyag ni Magpale nga may mga dapit sila nga gipanid-an kay nakadawat sila og report nga may nagpahigayon og cyber pornography. – /RUB) (BANAT NEWS)