CEBU, Philippines – Nasakmit sa kapolisan sa ilang pagpangronda ang mga armas ug shabu sa Zone Sibuyas, Paknaan, Dakbayan sa Mandaue nga niresulta usab sa pagkasikop sa usa ka tawo alas 6 pasado sa buntag sa niaging adlaw.
Si Senior Police Officer 1 Michael Limalima sa Presinto 2 sa Mandaue City Police Office (MCPO) niila sa nadakpan nga si Sabas Gitgano, 27-anyos, nga nagpuyo sa maong dapit.
Ang pagpangronda nga gipangulohan sa hepe sa Presinto 2 sa MCPO nga si Senior Inspector Narciso Ababo pinasikad sa search warrant nga giluwatan ni Judge Teresita Abarquez Galanida sa Branch 56 sa Regional Trial Court-7.
Nasakmit sa panimalay sa suspek ang duha ka medium-size nga shabu, 35 ka gagmay nga pakete ug mga drug paraphernalia.
Dugang ni Limalima nga ilang gibanabana nga ang kantidad sa shabu mokabat sa P200 mil kapin.
Nasakmit usab nila gikan sa panimalay sa suspek ang usa ka kalibre .357 uban sa unom ka bala ug .9mm nga pistola ug duha ka bala.
Gitataw ni Limalima nga gihimo nila ang pagpangronda human usab sa mga pagpaniid nga ilang gihimo sa mga ilegal nga kalihukan sa nahisgutang dapit.
Kasong kalapasan sa Republic Act 9165 o Comprehensive Dangerous Drug Act of 2002 ug ilegal nga paghupot sa armas ug Comelec gun ban ang ipasaka batok sa dinakpan kinsa nagtingkagol na sa bilanggoan. – /GMR) (BANAT NEWS)