Love triangle ug drugas gisusi sa pagpamusil sa duha ka babaye

CEBU, Philippines – Anggulo sa love triangle ug ilegal nga drugas ang gitan-aw sa mga imbestigador sa Homicide Section sa Cebu City Police may labot sa pagpamusil sa duha ka mga babaye nga gikan miduaw sa Cebu Provincial Detention and Rehabilitation Center niadtong nakalabay nga hapon.

Si Senior Police Officer 2 Wetzel Berry nga nahinabi sa Banat News miingon nga base sa impormasyon gikan sa warden, ang gibisita sa duha mao si Gino Pilapil kinsa napriso tungod sa kaso sa drugas.

Giapil usab nila ang anggulo sa love triangle human ilang nasayran nga nagbulag na si Pilapil ug ang kapuyo ug ang usa sa mga biktima nga si Epe maoy gikatahong iyang bag-ong hinigugma.

Plano karon ni Berry nga maatubang si Pilapil aron makuhaan og pamahayag kay aron kini makatabang sa pagsulbad sa kaso kay sila man usab ang katapusang naka-estorya sa mga biktima.

Ang duha ka mga biktima nga sila si Hannah Epe, 27, ug ang usa ka 14 anyos pa diay iyang kauban pulos taga Maribago, Dakbayan sa Lapu-Lapu.

Ang duha anaa gihapon sulod sa tambalanan nga pabiling gibantayan sa doktor gumikan sa delikadong samad pinusilan nga ilang naangkon.

Ang duha sakay sa habal-habal dihang gipusil sila sa mga lalaking nagsakay usab og motorsiklo nga nagsunod kanila.

Unang naigo sa ubos sa dunggan si Epe apan ang bala milapos sa iyang apapangig ug didto niungot sa tangkugo sa 14 anyos. Ang kapulisan una na usab nga nagduda nga bugtong target sa gunman mao si Epe ug naangin lang ang iyang kauban nga nalapsan sa bala. – /EIM) (BANAT NEWS)