CEBU, Philippines - Ang National Telecommunications Commission (NTC) gihangyo sa Hunta Probinsiyal sa Sugbo pagpahigayon og imbestigasyon kun nganong wala nay unlimited mobile internet surfing ang mga telecommunication companies.
Si Board Member Arleigh Sitoy nagkanayon nga sukad nga nauso na ang smart phones ang mga tawo paspas na ang komunikasyon ug transaksiyon sa internet ubos sa tabang sa unlimited mobile surfing .
Ang konsumidor morehistro lang kini sa ilang network aron maka-avail sa unlimited mobile surfing. Apan niining ulahi lang gitangtang sa duha ka local telecommunications company ang ilang unlimited mobile surfing.
Gipasabot ni Sitoy nga dili tanang tawo ang adunay cellphone nga adunay mobile surfing ug kadto lang gusto niini maoy maka-avail.
Apan karon ang mobile surfing service giilisan na kini og volume base service o cap nga diin nalimitahan na ang paggamit sa internet diha sa mga telepono. Ang mga telcos mihatag na lang karon og limitadong megabits per seconds (mbps) nga internet surfing mag-agad kun pilay gipa-load sa konsumidor.
Apan nakita ni Sitoy nga dili kini paigo hinungdan nga giawhag nila ang NTC sa pagpahigayon og imbestigasyon nganong giputol sa mga telcos ang maong serbisyo. (BANAT NEWS)