Swimming pool sa CVIRAA Meet wa pa’y tubig
CEBU, Philippines - Gikabalak-an nga dili mapahigayon ang lumba sa langoy sa Siyudad sa Naga atol sa Central Visayas Regional Athletic Association (CVRAA) gumikan kay wa pa mahuman ang swimming pool.
Hinuon si Mayor Valdemar Chiong nitug-an sa Banat News nga siya malaumon nga mapahigayon gyud ang lumba sa langoy aron dili kini mabuwag sa ubang events.
Matud ni Chiong nga iya na gi-estoryahan ang contractor nga mapaspasan ang ilang trabaho nga kinahanglang mahuman gyud sa katapusang semana sa Enero.
Ang CVIRAA ang gikatakdang sugdan karong Pebrero 7 sa bag-o lang nahuman nga standardized track oval nga nahimutang sa Naga Central School.
"Ako lang giingnan nga basta lang nga ma-establisar ang swimming pool dayon unya na lang na ang mga bleachers," matud ni Chiong.
Ang Olympic-sized swimming pool lakip sa mga proyekto ni Chiong inubanan sa track oval nga nikantidad og P68 milyones.
Gani ang maong rubberized track oval ang gilihian og gamit sa kabataan sa Naga human ila kining gigamit atol sa City of Naga District Athletic Association (CNDAA) Meet niadtong niaging tuig. Apan ang maong proyekto ni Chiong ang nakasugat sab og mga kontrobersiya human adunay pipila ka conservationists ang nibabag sa pagputol sa mga kahoy nga naigo sa track oval. (BANAT NEWS)
- Latest
