CEBU, Philippines - Kritikal ang kahimtang sa duha ka mga babaye nga gikan pa niduaw sa Cebu Provincial Detention and Rehabilitation Center sa dihang sila gipamusil sa mga lalaking nagsakay og motorsiklo diha sa Brgy. Kalunasan ning Dakbayan sa Sugbo kagahapon sa hapon.
Ang duha giila nga sila si Hanna Epe, 29, taga Leyte, ug ang iyang kauban giila lang sa pangalan nga “Kim.”
Matud pa ni Police Officer 3 Winston Ybañez, imbestigador sa Homicide Section sa Cebu City Police Office nga nahinabi sa Banat News nga pasado alas 4 sa hapon nanggawas sa CPDRC ang duha gikan niduaw.
Misakay og habal-habal ang duha nga gikatahong paingon unta sa dakbayan sa Mandaue, apan pag-abot nila sa ubos sa CPDRC usa ka motorsiklo ang ilang nasugatan nga adunay sakay nga duha ka lalaking nagsuot og helmet.
Matud pa mibalik sa agi ang mga lalaki ug misunod sa ilang gisakyan ug kalit gipusil si Epe nga naigo sa ubos sa iyang dunggan ug ang bala milapos sa iyang apapangig dayon milapos ngadto sa tangkugo ni Kim ug niungot didto.
Human sa hitabo dali usab kaayo nga misibat ang mga mamumuno samtang gidala sa usa ka pribadong tambalanan ang duha. Daku ang pagtuo ni Ybañez nga si Epe ang target ug napagan lang iyang kauban. Matud pang Ybañez talandugon ang kahimtang sa duha atol ning pagsulat sa balita.
Matud pang Ybañez, ilang nakaestorya ang uyoan ni Epe ug kini mibutyag nga adunay daghang kaso nga estafa ang biktima gikan sa mga salon nga iyang gipangsudlan tungod kay dili kini mobayad.
Gisubay karon kung kinsa ang giduaw sa mga biktima sa CPDRC sa pamasin nga ilang magamit sa ilang imbestigasyon.
Samtang si SPO2 Witzel Berry, laing imbestigador sa homicide section nga nahinabi sa Banat News miingon nga posibleng eksperto ang gunman kay maayong pagkaigo sa biktima bisan og parehos silang nagsakay og motorsiklo. (BANAT NEWS)