CEBU, Philippines – Mga pinayuhot nga imported frozen processed meat nga walay permit gipangsunog kagahapon sa usa ka bakanteng lote sa Mactan –Cebu International Airport Dakbayan sa Lapu-Lapu kagahapon sa buntag.
Si Dr. Arnie Delas Marias, quarantine officer sa Bureau of Animal Industry sa MCIAA nagkanayon nga anaa sa 200 ka kilong karne ang gidauban.
“(They) have no permit that means it is smuggled. Bisan gamay ang dad-on (sa karne) o personal consumption dili pwede,” matud ni Delas Marias sa mga tig-balita. Ang mga karne gikumpiska sugod sa miaging Disyembre hangtud sa sayong bahin sa Enero ning tuiga ug gikan pa kini sa laing nasud sama sa South Korea, Hong Kong ug Japan.
Matud ni Delas Marias pulos kini mga branded nga produkto sa processed meat apan walay mga import permit.
Ang pagsunog sa maong mga karne gihimo aron pagpamatuod nga dili dad-on aron kan-on sa mga taga Bureau of Quarantine ang masakmit nga karne human adunay nanggawas nga estoryang ilaha lang kining dad-on sa ilang pamilya.
“This is to show people nga amo gisunog ug wala namo gikaon,” dugang ni Delas Marias.
Saksi sa pagdaob sa mga karne ang mga opisyal sa GMR-Megawide Cebu Airport Corporation, Bureau of Customs, Commission on Audit ug ang Aviation Security Unit-7. – /EIM) (BANAT NEWS)