Mga dalan sirad-an atol sa IEC

CEBU, Philippines - Pipila ka dalan sa Dakbayan sa Sugbo sirad-an atol sa kalihokan sa International Eucharistic Congress (IEC) sunod semana.

Matud ni Cebu City Transportation Office (CCTO) Executive Director Atty. Rey Gealon nga nihangyo ang organizers sa IEC sa pagpasira sa dalan nga gamiton sa IEC.

Ang dan nga sirad-an mao ang M.J Cuenco Avenue, MC Briones hangtud sa Legaspi Extension, Arellano Blvd. sa Enero 24 atol sa pagbukas sa IEC nga pagahimuon diha sa Plaza Independencia.

Dili usab tugutan paagian ang SRP Tunnel sugod alas 3 sa hapon hangtud mahuman ang kalihokan sa Plaza Independencia.

Ang mga sakyanan gikan sa North ug South nga diha mag-agian sa SRP tunnel ug coastal road adto na moagi sa Imus Road ug N. Bacalso Avenue. Ang mga sakyanan nga paingon sa downtown moagi na didto sa Osmeña Blvd., Zulueta ug dan Jakosalem.

Sugod Enero 25-29 dili paagian ang Pope John Paul II sugod alas 5 sa buntag hangtud alas 9 sa buntag ug alas 2 sa hapon hangtud alas 7 sa gabii gikan sa TEDSA hangtud na sa Cardinal Rosales Avenue, ang mga sakyanan anha paagion sa Gorordo Avenue, Mindanao Avenue o General Maxilom Avenue.

Sirad-an usab sa dan Escario mao usab ang F. Ramos hangtud sa dan Gil Garcia ug sa Osmeña Blvd. mao ang gikan sa Escario paingon sa dan Don Jose Avila.

Samtang atol sa Solemn Procession sirad-an ang Osmeña Blvd gikan sa Capitol paingon sa Plaza Independencia ini’g Enero 29. Magpahigayon usab og re-routing alang sa mga Public Utility Jeepney (PUJs).

Atol usab sa Holy Eucharist ug Sinulog Presentation sa Enero 31 diha sa Sport Complex, sirad-an ang dan Pelaez, Leon Kilat, Sanciangko St., Arlington Pond St.,ug Pelaez. Gihangyo sa CCTO ang tanan nga motorista sa taas nga pasensya ug pagsabot sa talagsaon nga kalihokan sa simbahan. (BANAT NEWS)