30 ka bata ang na-missing

CEBU, Philippines – Moabot 30 ka mga bata ang na-missing atol sa selebrasyon sa Sinulog 2016 ug padayon pa karong gipangita base sa talaan sa Cebu City Command Center (C3).

Giawhag ni Cebu City Acting Mayor Edgardo Labella ang Department of Social Welfare Services (DSWS) ug Department of Social Welfare Development (DSWD) nga makig-alayon sa kapolisan sa pagpangita sa mga bata nga nawala atol sa Sinulog. Base sa natala sa Cebu City Command Center (C3) ang nangawala anaa sa pangidaron usa pa ka tuig hangtud 10 anyos.

Matud ni Cebu City Disaster Risk Reduction Management Council (CCDRRMC) head konsehal Dave Tumulak nga ang mga bata nga nawala gikan sa laing lugar. Dugang pa ni Tumulak nga aduna usab duha ka senior citizen nga nawala diha sa Basilica Minore del Sto. Niño de Cebu.

Giawhag karon sa dakbayan ang katawhan nga nakasagop niining mga bataa sa pagduol sa City Hall aron mauli ngadto sa ilang mga ginikanan ang mga bata ug ang duha ka senior citizens nga nawagtang.

Daan nang mipahimangno ang kapolisan nga kun adunay mga batang dad-on atol sa Sinulog, kinahanglang pasuoton sila og identification cards nga adunay ilang pangalan, pangalan sa mga ginikanan, address ug contact numbers.

Atol sa kalihokan, kapin 200 ka mga medical emergencies ang narespondehan sa Emergency Mobile Services sa siyudad ug sagad niini nakuyapan tungod sa gutom ug kainit sa panahon. – /EIM) (BANAT NEWS)

Show comments