Mga mangunguot nakabiktima
CEBU, Philippines – Upat ka mga kaso sa pagpanguot ang natala sa Waterfront Police Station atol sa fluvial procession kagahapong adlawa.
Usa sa mga biktima ang nakuotan sulod sa simbahan sa Sto. Niño nga mitambong og Misa, samtang ang laing biktima ang nalingaw og tan-aw sa pag-abot sa imahen sa Senyor Sto. Niño diha sa Plaza Independencia.
Sa pagkutlo sa balita alas 2 kagahapon sa hapon, upat ka mga kaso sa pagpanguot ang natala sa maong buhatan ug adunay duha sa Carbon Police Station.
Matud ni Senior Police Officer 4 Blas Ejoc, desk officer sa Waterfront Police nga nahinabi sa Banat News, usa sa nakuotan ang US citizen nga si Lito Chavez, 59, lumad nga taga Cavite nga nituyo og anhi dinhi aron mosaksi sa Sinulog.
Nawala ang iyang pitaka nga adunay sulod nga P10 mil cash, $400, drivers license, visa ug mga ATM cards.
Samtang sulod sa simbahan sa Sto. Niño nabiktima usab sa mga kiriwan og kamot si Ivy Verallo, 64, lumad nga taga dakbayan sa Bogo og kasamtangan nga nagpuyo sa Barangay Tejero. Pipila ka oras ang milabay, usa ka Virginia Medida, 55, taga Carcar ang nakawatan usab sa iyang pitaka diha sa Osmeña Boulevard.
Laing nireklamo mao si Sergio Yncierto, 57, nga taga Cordova kay gikuot iyang bulsa ug gikuha ang iyang P15 mil nga pangompra sa iyang palitonon.
Ang hepe sa Police Community Relations (PCR) sa Cebu City Police Office, Chief Insp. David Señor nga nahinabi sa Banat News miingon nga bisan pa man sa maong mga hitabo malinawon ang gihimong fluvial procession. Subli siyang nanawagan sa publiko nga magmabinantayon kanunay ug dili na magdala og dakong kantidad o mga mahalong gamit aron di matintal ang mga kawatan. – /EIM) (BANAT NEWS)
- Latest
