CEBU, Philippines – Dul-an 100 ka mga sakyanan sa dagat ang gikatakdang mosalmot sa ipahigayong tinuig nga fluvial procession gikan sa Ouano Wharf sa Dakbayan sa Mandaue paingon sa Pier Uno sa Dakbayan sa Sugbo karong buntag.
Ang Philippine Coast Guard mipasidaan nga dili makasalmot sa fluvial procession kadtong way permit gikan sa Maritime Industry Authority alang sa kaluwasan sa mga mosalmot.
Sa final briefing sa tanang mga partisipante kagahapon gipahibawo sila sa mga angay nilang buhaton lakip na ang mga gidili atol sa kalihukan.
Si Commander Agapito Bibat, Coast Guard Cebu Station Commander mipasabot sa mga operators nga kinahanglang way mag-overloading ug aduna gyuy tagsatagsa ka mga life jackets ang mga manakay sa ilang sakyanan sa dagat.
Ang PCG inabagan sa Philippine Navy adunay ipakatap nga mga sea marshals aron maoy magsiguro nga sundon sa mga boat operators ang mga patakaran alang sa kaluwasan sa prosisyon.
Niadtong adlaw'ng Huwebes ang ahensiya mihimo og survey inspection sa rota sa fluvial procession gamit ang BRP Ilocos Norte -SARV 3501.
Ilang gisusi kun unsay mga angay bantayan nga makababag unya sa dagan sa Galleon nga maoy sakyan sa imahen sa Senyor Sto. Niño ug Birhen sa Guadalupe. Ang fluvial procession magsugod alas-6 sa buntag apan alas 4:00 pa lamang sa kaadlawon andam na ang Mactan Channel sa tanang maritime traffic ug mobalik sa normal ang operasyon pagka-alas 9 na sa buntag.(Decemay P. Padilla/EIM)(BANAT NEWS)