CEBU, Philippines – Giawhag ni One Cebu gubernatorial candidate Winston F. Garcia ang tanang local ug national candidates sa pagrespeto sa ka-solemne sa kalihukan sa Sinulog ug dili sakyan sa pamolitika.
Kini human gipahibawo ni assistant Provincial Administrator Ramil Abing nga upat ka senatoriables sa Liberal Party ang mokuyog sa contingent sa Kapitolyo.
Sila mao si vice presidential candidate Leni Robredo, senatorial candidates Leila De Lima, Joel Villanueva ug Risa Hontiveros.
Bisan siya usab kandidato, si Garcia kinsa usa ka kanhi seminarista ug deboto sa Senior Santo Niño ang nakighiusa sa kaparian sa pagpalig-on sa pagtuo sa mga Sugbuanon nga gipakita pinaagi sa Sinulog ug dili sa politika.
Si Abing niklaro nga mosunod sila sa lagda sa Sinulog Foundation, Inc. nga wala’y tugutan nga kandidato nga makapangampanya atol sa Sinulog.
Dili sila tugutan nga magsul-ob sa ila’ng campaign T-shirts ug hatagan sila sa Kapitolyo og mga Sinulog T-shirts.
Giklaro usab ni Abing nga wala’y mosakay sa float sa Kapitolyo ug maglakaw ang mga mo-uban sa parada.
Nikabat sa P1.4 milyones ang gastuhon sa Kapitolyo alang sa Sinulog diin ang P500,000 niini alang sa float ug ang uban alang sa props, costume, pagkaon ug uban pa’ng panginahanglanon sa ila’ng contingent. (Gregg M. Rubio ug Brenda D. Batuto/GMR)(BANAT NEWS)