CEBU, Philippines - Nalandig sa tambalanan ang 22- anyos nga lalaki human gipusil sa iyang gikakontra sa duwa nga basketball diha sa James Town Subdivision, Brgy. San Roque, Dakbayan sa Talisay niadtong Miyerkules sa gabii.
Ang biktima mao si Jovanni Carlos, 22, taga Barangay Mambaling, Cebu City samtang ang nagpusil kaniya mao si Reybelio Yap, 32, taga Barangay Sambag 1, Cebu City.
Si Police Officer 1 Marlon Anabeza sa Talisay City Police Station nitug-an sa Banat News nga ang grupo sa biktima ug suspek ang nag-abot sa nahisgutang lugar ug nagkasabot nga magduwa bugti sa pusta nga tag P500 matag grupo.
Sa tunga-tunga sa ilang duwa, nagkasinikhanay ang duha ug nisangpot sa karambola sa duha nila ka grupo.
Apan ang suspek nikuha kini sa iyang .45 nga armas dayon gipusil ang biktima sa wala nga paa.
"Nagkainitay na sila kay nilaban na man sa ilang pusta. Lahi man gyud ning moduwa ta nga adunay pusta gud gamay bikil sumbagay dayon," asoy pa ni Anabeza.
Asoy pa ni Anabeza nga nahunong ang rambol human ang biktima nahagba ug gidala sa Talisay City District Hospital samtang ang suspetsado nasikop sa mga nirespondeng kapulisan.
Na-recover sa mga pulis ang armas sa suspek nga adunay pito ka mga bala ug usa ka basiyo niini diha sa crime scene. (BANAT NEWS)