CEBU, Philippines - Subsob ang practice sa mga mosayaw sa Sinulog gikan sa Kapitolyo nga gilangkuban sa 80 ka dancers isip guest performers karong Domingo.
Matud sa choreographer nga si Jessie Jumamoy nga nanguha sila og 20 ka dancers nga taga Labangon, Dakbayan sa Sugbo tungod kay ang ubang kawani sa Kapitolyo dili ganahan nga moapil sa sayaw.
Hinuon matud ni Jumamoy nga bisan og mubo lang nga panahon ug gamay lang ang ila’ng oras sa pag-practice sa sayaw apan dali kaayo’ng nakakat-on ang mga dancers.
Ang tema sa Kapitolyo mao ang “Kalamboan sa Matag Sugboanon”.
Matud ni Jumamoy nga bisan og guest performer lang sila apan alang kanila sama sila sa ubang contingents tungod kay subsob man usab kaayo ang ila’ng pagpangandam ilabi na sa choreography.
Hangtud kagahapon wala’y nakita’ng mga opisyal o department heads sa Kapitolyo nga niapil sa practice.
Alang kang Jumamoy nga labi’ng maayo unta kung may opisyal nga moapil sa paghalad nila og sayaw sa Senior Santo Niño.
Isul-ob nga costume sa mga dancers sa Kapitolyo mao ang Maria Clara-inspired nga may kombinasyon sa kolor nga tangerine ug puwa ug adunay sagol nga gold. (BANAT NEWS)