Nibabag sa mainit spring gikiha

CEBU, Philippines - Gipasakaan na og kiha ang siyam ka tawo nga giingong niali sa agianan padulong sa Mainit Spring sa Lungsod sa Malabuyoc.

Kasong malicious mischief ang gipasaka ni Eric Ybas, municipal tourism officer, batok nila’ng Alexander Teopiz, Raul Teopiz, Alejandro Teopiz, Mimie Salvana, Joseph Salvana, Jr., Carmen Teopiz, Rosita Teopiz, Lucela Legara ug Leonora Legara, pulos taga Barangay Montañeza.

Matud ni Atty. Benjamin Cabredo, Jr. kinsa niabag sa pagsang-at sa kaso nga usa siya sa interesado sanglit ang lugar dili lang alang sa turismo kung dili gihimo kini’ng adtoanan sa mga may masakiton gumikan kay makaayo ang init nga tubig sa mao’ng tubod.

Matud ni Ybas nga gipasemento sa lokal nga kagamhanan ang barangay road aron sayon sa mga tawo ang pag-adto sa Mainit Spring.

Apan nahunong ang pagsemento human gihulga ang mga trabahante sa usa sa mga gikiha.

Ang gihimo sa mga gipangkiha nakapaubos sa kita sa lungsod ug daghang turista ang nipadangat na sa ila’ng reklamo pinaagi sa social media.

Laing kaso nga grave threat ang gipasaka batok kang Alexander.

Ang Mainit Spring dili una maapil sa adtuon sa Suroy-Suroy Sugbo sa probinsiya karong Enero 20 ngadto sa 22 gumikan sa bangi  tali sa lokal nga kagamhanan ug sa giingong mga tag-iya sa lote nga gihimo’ng karsada.

Gipasabot ni Grace Paulino, provincial tourism officer, nga tumong nila ang safety sa mga bisita ug nanagana sila nga posible’ng adunay mahitabo’ng tensiyon sa lugar atol sa okasyon.

Ang mga residente sa lugar una’ng nipadangat sa ila’ng reklamo sa buhatan ni Bise Gobernador Agnes Magpale niadto’ng Lunes.

Ang kagamhanan sa Malabuyoc nangangkon nga ang mao’ng karsada nga gisemento barangay road kini ug sila ang responsable sa pagpaayo niini.

Apan ang ubang residente nangangkon nga ang karsada nga gisemento tipik kini sa ila’ng luna.

Giingong wala konsultaha ang mga residente sa lugar sa wala pa ipatuman ang proyekto.

Ang lokal nga kagamhanan nagkanayon nga nagpahigayon sila og public hearing apan giingong wala’y nitambong. (BANAT NEWS)