CEBU, Philippines - Namatay sulod sa tambalanan ang usa ka 65-anyos nga urban poor leader ug tigpamaba sa mga nasunogan sa Sitio Avocado, Brgy. Lahug ning Dakbayan sa Sugbo human kini gipusil samtang naglakaw paingon sa iyang balay niadtong Miyerkules sa gabii.
Ang biktima mao si Virgilio “Tatay Billy” Gabyana, taga Sitio San Roque sa maong barangay.
Sa impormasyon nga nakuha sa Banat News gikan sa iyang mga kaubanan, gikan pa sila mitambong og tigum kauban ang mga nasunogan sa Sitio Avocado alang sa plano nilang paglusad unta og rally kagahapong adlawa kabahin sa sitwasyon sa mga nasunogan.
Matud pa sa ilang kauban, apil sa nasunog ang balay sa biktima nga maoy gipuy-an karon sa iyang asawa diha sa Sitio Avocado.
Gawas sa mga kauban nga nasunogan, gikatahong lider-lider usab sa uban pang urban poor homeowners dinhi sa dakbayan ang biktima.
Sumala pa sa imbestigasyon, human sa ilang tigum namauli na ang mga mitambong sa ilang tapok ug ang biktima nagbaklay balik sa ilang balay.
Apan pipila ka gutlo ang milabay milanog ang sagunson nga buto sa armas ug sa pagsusi sa mga tawo nagbuy-od na sa yuta ang biktima ug ila kining gidala sa Perpetual Succuor Hospital apan nakabsan kini sa iyang kinabuhi.
Si Senior Police Officer 4 Rogelio Cañete, imbestigador sa Homicide Section sa Cebu City Police Office nga nahinabi sa Banat News miingon nga usa sa ilang gitutokan karon nga motibo ang pagka-lider sa biktima sa urban poor groups tungod kay wala kini kontra sa ilang dapit.
Si Cañete mitug-an nga adunay nakakita sa dagway sa gunman tungod kay nagpangutana pa kini sa mga tawo.
Tulo ka mga suspek ang gisundan sa kapulisan, usa ang mipusil, ang look out ug ang drayber sa motorsiklo nga pulos batan-on.
Matud pa ni Cañete planado ang pagpatay sa biktima apan dili pa hanas sa ilang trabaho ang mga kriminal.
“Upat ka buto ang nadungog sa mga tawo pero ang igo sa biktima usa ra, meaning beginners pa ning nagtira kay kung hanas ning gunman igo ‘to tanan kay close range ra man ang pagtira,” matud pa ni ya. (BANAT NEWS)