CEBU, Philippines - Nibahad si kanhi mayor Tomas R. Osmeña nga iyang ikiha og kasong kriminal si suspended Mayor Michael Rama kun mapamatud-an sa Office of the President nga sad-an sa pagpanghatag og tag P20 mil nga calamity assistance sa mga opisyal ug kawani sa City Hall niadtong 2013.
Matud ni Osmeña nga kung mamatud-an si Rama sa kasong grave misconduct, igo ra kini masuspenso kay administratiba ra man mao nga gusto ni Osmeña nga ikiha niya si Rama og kriminal aron mapriso.
Nagtuo si Osmeña nga gisugo ni Rama ang iyang girlfriend nga si kanhi konsehal Joy Pesquera aron iuli sa City Treasurer’s Office ang P20 mil nga iyang nadawat sa pagtuo nga makalikay kini sa silot. Apan si Pesquera nibarug nga wala siya sugoa ni Rama nga iuli ang kantidad nga nadawat sa mayor.
Si Pesquera nga usa ka abogado nipasabot nga gusto niya nga mabutang sa patas nga sitwasyon si Rama ug ubang konsehal nga niuli sa nadawat nga tag P20 mil nga calamity assistance.
Matud ni Pesquera nga kung si Rama lang ang suspensuhon sa Malacañang ug dili apilon ang mga konsehal nga nanguli sa ilang tag P20 mil, maisip nga kwestiyonable ang mao’ng lakang. Si Rama niingon nga nagpabilin ang iyang baruganan nga legal ug adunay basehanan ang pagpanghatag sa calamity assistance sa mga opisyal ug kawani sa City Hall.
Kini bisan pa og ang Commission on Audit nimando na sa pagpauli sa nadawat nga tag P20 mil kay dili tinuod nga sila nabiktima sa linog ug sa bagyong Yolanda niadto’ng 2013. Ang pagbayad ni Pesquera sa P20 mil niadtong Enero 8 gihimo samtang sibaw na kaayo ang tabi-tabi nga si Rama suspensuhon na usab tungod sa pagpanghatag niya og tag P20 mil nga calamity assistance.
Samtang wala’y plano si Pesquera sa pagbawi sa P20 mil dungan ang pag-angkon nga wala siya nagpahibawo kang Rama sa iyang gihimo.
Si Pesquera nituo sa hugon-hugon nga kaalyado ra sa Team Rama nga mga konsehal ang suspensuhon lakip ang mayor.
Si Rama sa iyang bahin dili usab mosugo sa pagkuha sa P20 mil bisan pa man og iya kini gisalikway tungod kay wala siya nagsugo sa pagpabayad niini. (BANAT NEWS)