Publiko pasayuhon aron di matrapik

CEBU, Philippines – Giawhag sa mga nag-organisar sa mga kalihokan sa Sinulog 2016 ang katawhan nga adunay mga lakaw o biyahe nga mosayo sa ilang paglakaw aron di sila matanggong sa trapiko nunot sa mga kalihokan sa kapistahan.

Sa pagpatuman sa bag-ong rota alang sa Traslacion karong Biyernes, Enero 15 gikan sa Basilica Minore Del Sto. Niño padulong na sa National Shrine of St. Joseph sa Dakbayan sa Mandaue gipanglantawang maapektahan gyud ang mga lakaw sa mga tawo. Nag-unang maapektahan ang mga tinun-an ug mga trabahante nga moagi sa Cebu City North habig sa Barangay Banilad ug Talamban apil ang dalan Hi-Way Seno, A.S Fortuna, A. Del Rosario ug SB Cabahug sa dakbayan sa Mandaue.

Kini atol sa ipahigayong Traslacion gikan sa alas 7 sa buntag hangtod na sa alas 10 sa buntag maong mas maayong mobiya na silang daan sa mas sayo-sayo pa aron di matanggong sa trapik.

Matud ni Atty. Paulino Yabao, Legal Adviser sa Basilica nga gihimo ang kausaban aron paghatag og higayon sa ubang mga tawo ug deboto nga makasinati sa kalipay ug grasya kun maagian sa imahen sa Balaang Bata. Estrikto usab ang pagdili sa mga balloons, pabuto, pagkuha og buwak ug pagpahid sa karo atol sa Traslacion ug sa fluvial procession.

Alas-6 sa buntag mogikan ang barko ML San Antonio Sibulan nga magsilbing galleon sa Senyor Sto. Niño pabalik sa Cebu City. – /EIM) (BANAT NEWS)