TRO gipagawas batok reblocking sa Sitio Avocado

CEBU, Philippines – Nipagawas og 72-hour temporary restraining order (TRO) ang korte kalabot sa luna sa University of the Philippines –Cebu sa Sitio Avocado sa Barangay Lahug ning Dakbayan sa Sugbo nga bag-ohay lang nasunog.

Si Cebu City Regional Trial Court Executive Judge Soliver Peras mimando nga way pasudlon, walay reblocking ug walay construction nga mahitabo sud sa maong luna nga gipuy-an sa mga informal settlers. Nakakita si Peras og igong basihan ug “urgency” aron mopagawas sa TRO aron malikayan ang “grave injustice and irreparable injury” nga mahiaguman sa UP.

Kahinumduman nga niadtong Biyernes nipasaka og civil case for injunction ang UP, nga girepresentahan sa ilang dean nga si Atty. Liza Corro batok sa City of Cebu, nga sa representahan ni acting Cebu City Mayor Edgar Labella, City Administrator Lucelle Mercado, Collin Rossel, head sa Cebu City Division for the Welfare of the Urban Poor (DWUP), ug ubang miyembro sa Prevention, Restoration, Order, Beautification, and Enhancement (PROBE) ug uban pa.

Matud ni Corro nga ang UP Cebu mao ang tag-iya sa Lot No. 911 B2 C2 E, base sa Transfer Certificate of Title (TCT) No. 31166 nga may gilapdong 4,000 square meters sa Gorordo Avenue, Lahug, Cebu City.

Niadtong 2014, matud ni Corro, si Virgilio Nunez, ang lider sa mga Informal Settlers Committee mipadala og demand letter ngadto sa residente nga niawhag kanila pagbiya sa lugar sud sa 30 ka adlaw apan wala motuman niini ang mga molupyo.

Apan matud ni Corro, human masunog ang mga balay sa yuta diin sila ang tag-iya, miadto sila sa fire site ug nagbutang og tent, kural kay ilang okupahon ang 200 square meters nga tukoran unta sa high school building.

Mi- offer usab sila og relocation site sa Barangay Busay, apan nasurpresa na lang sila dihang si Mercado, Rossell ug mga sakop sa PROBE mitangtang sa ilang tents ug nagbutang og laing tent nga naay pangalan nga City of Cebu niadtong Enero 3, 2016. Matud ni Corro ang yuta nga gihatag sa Province of Cebu sa UP para sa educational purposes ug dili residential area para sa tanan.

Tungod niana, nangayo sila’g tabang sa korte nga mopagawas og TRO ug permanent injunction to stop the city government and others to use their lot.

Matud usab ni Atty. Rene Abcede, Jr., usa sa mga counsel sa UP nga mopasaka usab sila’g kaso batok sa informal settlers tungod sa pagpamugos nila pagsud sa maong luna. – /EIM) (BANAT NEWS)