CEBU, Philippines – Patay na ang inila’ng political writer ug abogado nga si Napoleon Rama sa edad nga 92 gumikan sa sakit sa kasingkasing sa niaging adlaw didto sa kauluhan.
Kini ang gikompirmar sa iya’ng pag-umangkon nga si Cebu City Mayor Michael Rama kinsa suspendido sa pagkakaron human siya gipahibawo ni Gina Rama, anak sa namatay.
Si Napoleon gitugahan sa Malacañang niadto’ng 2011 og Presidential Legion of Honor isip Grand Commander ug Palanca Awardee.
Si Napoleon kauban ni anhing Senador Benigno Aquino Jr. nga nabilanggo panahon sa Martial Law.
Siya anak ni anhing Senador Vicente Rama nga giila nga “Father of Cebu City” tungod sa iya’ng pagpangamahan sa balaud sa paghimo nga siyudad sa Sugbo.
Nahimo’ng bise presidente 1971 Constitutional Convention ug nahimo’ng sakop sa 1986 Constitutional Commission ug sa 1987, nahimo’ng floor leader sa Con-Con.
Isip political writer, ang iya’ng sinuwat nga "North Borneo Belongs To US" napublikar sa Philippine Free Press ug nahimo’ng basehanan sa nasud sa negosasyon sa pag-angkon sa Borneo.
Si Napoleon nakatrabaho sa Philadelphia Bulletin sa Philadelphia U.S.A. ug nahimo’ng "Journalist of the Year" sa 1959. Siya ang editor sa bugtong Spanish newspaper sa Cebu nga El Observatorio nga nagmantala sa mga balita bahin sa Spain ug South-America. Siya gihatagan sa Premio Zobel niadto’ng 1992. – /GMR) (BANAT NEWS)