CEBU, Philippines - Sa una’ng higayon magtagbo ang mga medical personnel sa St. Anthony's Mother and Child Hospital ug sa ginikanan niadto’ng walo ka buwan nga bata nga si Harry Morgan Ylaya Visaya kinsa namatay sa giingong pagpabaya sa mga doctor.
Karong Enero 13 sa alas dos sa hapon, ang Professional Regulations Commission nagpatawag og preliminary hearing sa duha ka habig.
Matud ni Marifhe Ylaya, inahan sa bata, nga wala sila’y laing tinguha kun dili ang hustisya lang gyud sa kamatayon sa iya’ng anak ug mapasabot siya kung ngano’ng naabot sa punto nga namatay nga gidala man unta niya sa tambalanan.
Si Ylaya nitug-an sa Banat News nga niini’ng panagkita unya nila pagbalik sa mga personel nga nihupot sa iya’ng anak manumbalik na usab sa iya’ng panumduman ang tanang kasakit.
“Mas mosamot ang kasakit kung ila pa gyud ko bakakan ug tabunan ang dili maayo’ng binuhatan," matud ni Ylaya.
Si Atty. Ferdinand Berongoy, legal counsel sa mga ginikanan, nitug-an sa Banat News nga ang direksyon nga ila’ng gisubay karon mao ang hustisya para sa bata nga namatay ug aron usab mahatagan og leksiyon ang mga tawo kung aduna man gani sila’y tulubagon.
Matud ni Berongoy nga ila’ng giduso ang reklamo ug revocation of license on gross negligence tungod kay siya nagtuo nga adunay lapso nga nahimo ang mga medical personnel.
Ang bata namatay niadto’ng Hunyo 7. (BANAT NEWS)